• Hrossagaukur

    ©Jóhann Óli Hilmarsson

  • ©Jóhann Óli Hilmarsson

  • Hrossgaukur að vetri til

    ©Jóhann Óli Hilmarsson

  • ©Jóhann Óli Hilmarsson

  • „Hneggjar“

    ©Jóhann Óli Hilmarsson

Almennar upplýsingar

Hrossagaukur (einnig kallaður mýrispýta eða mýrisnípa) er algengur meðalstór vaðfugl sem fer gjarnan huldu höfði. Hann er í brúnum og ryðrauðum felulitum, nema kviðurinn er hvítur. Mógular rákir á höfði og eftir endilöngu baki eru einkennandi, auk dökkra koll- og augnráka. Jaðrar stélfjaðranna eru hvítir. Kynin eru eins.

Fluglagið er rykkjótt og sérkennilegt. Á vorin flýgur hrossagaukur hringflug yfir óðali sínu og hneggjar án afláts. Erfitt er að koma auga á hann á jörðu niðri, því hann er var um sig og felugjarn. Þegar hann er fældur flýgur hann snögglega upp með skrækjum og hverfur á braut með hröðum vængjatökum eða steypir sér snöggt til jarðar. Fremur ófélagslyndur fugl.


Fæða og fæðuhættir:
Potar löngum goggnum í votan og mjúkan jarðveg og tínir upp orma, tekur einnig aðra hryggleysingja eins og lirfur, bjöllur og áttfætlur.


Fræðiheiti: Gallinago gallinago

Kjörlendi og varpstöðvar

Verpur í mýrlendi en einnig á þurrari svæðum á láglendi, t.d. í kjarrlendi og jafnvel uppi á heiðum. Hreiðrið er venjulega vel falin dæld, í sinu eða öðrum gróðri, fóðruð með grasi og sinu. Utan varptíma (á fartíma) er hann aðallega í votlendi en á veturna í opnum skurðum, dýjaveitum og á jarðhitasvæðum.


Varp- og ungatímabil


Dvalartími á Íslandi

Útbreiðsla og ferðir

Hrossagaukur er að mestu farfugl. Fáeinir fuglar hafa vetursetu, þeir finnast í flestum landshlutum. Meginvetrarstöðvarnar eru í Vestur-Evrópu, mest á Írlandi. Hann verpur víða í Evrópu og Asíu.

Varpstöðvar
Vetrarstöðvar
Litaskýringar

EGG

HREIÐUR

UNGAR